Poems
ಆಮಿ
ಎಚ್ಚೆಮ್ ಪೆರ್ನಾಳ್
ಸಂಪಾದಕೀಯ್:
ದಾರಾಂ ಆನಿ ಜನೆಲಾಂಚ್ಯಾ ಘರಾಂತ್ ಕೈದಿ ‘ಆಮಿ’
ದಾರಾಂ ಆನಿ ಜನೆಲಾಂ ಭಿತರ್ ಜಾಯ್ತೆಂ ಘಡ್ತಾ. ಅಸಲ್ಯಾ ಘಡಿತಾಂಚಿ ದುಸ್ರಿ ಕವಿತಾ ಎಚ್ಚೆಮ್ಮಾನ್ ಬರಯ್ಲ್ಯಾ. ಹಾಂಗಾಸರ್ ಮುಂಬಯ್ಚೆಂ ವೆಳಾಕ್ ಮಿಕ್ವೊನ್ ಚಲ್ಚೆಂ ಜಿವಿತ್ ಕವಿನ್ ಕೆನ್ವಸಾಚೆರ್ ಪಿಂತುರ್ ಪಿಂತ್ರಾಯಿಲ್ಲ್ಯಾಬರಿ ಪಿಂತ್ರಾಯ್ಲಾಂ.
ಲಗ್ನ್ ಜಾವ್ನ್ ಭುರ್ಗಿಂ ಜಾವ್ನ್, ರುಪ್ಯೋತ್ಸವ್ ಜಾಲೊ ತರೀ ಬಾಯ್ಲೆನ್ ಘೊವಾಕ್ ಆನಿ ಘೊವಾನ್ ಬಾಯ್ಲೆನ್ ಸಾರ್ಕೆಂ ಪಳೆಂವ್ಕ್ ನಾತಲ್ಲ್ಯಾವಿಶಿಂ, ಸಾರ್ಕೆಂ ವೊಳ್ಕನಾತಲ್ಲ್ಯಾವಿಶಿಂ ಮುಂಬಂಯ್ತ್ ಜಾಯ್ತಿಂ ನಿದರ್ಶನಾಂ ಆಸಾತ್. ತಸಲ್ಯಾ ಎಕಾ ಜಿವಿತಾಕ್ ಹ್ಯಾ ದಾರಾಂ ಆನಿ ಜನೆಲಾಂ ಆಸ್ಚ್ಯಾ ಘರಾಂತಯ್ ಕೈದಿ ಜಾಲ್ಲ್ಲಿಂ ‘ಅಮಿ’ ಸಾಕ್ಸ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮಿ
ಆಮ್ಚ್ಯಾ ಘರಾಕ್ ಬಾಗ್ಲಾಂ ದೋನ್ಏಕ್ ಮ್ಹಾಕಾ, ಅನ್‍ಎಕ್ ತುಕಾ
ಹಾಂವ್ ಯೆತಾನಾ ವೆತಾಯ್ ತೂಂ
ಯೆತಾನಾ ತೂಂ ವೆತಾಂ ಹಾಂವ್
ಆಮ್ಚ್ಯಾ ಘರಾಕ್ ಜನೆಲ್ ಏಕ್
ಸುಟಿಯೆ ದಿಸಾ
ಹಾಂವ್‍ಯೀ ತೂಂಯೀ
ತಾಂತ್ಲ್ಯಾನ್ ಸಾಂಗಾತಾ ಚೊಯ್ತಾಂವ್
ರಸ್ತ್ಯಾ ವಯ್ಲ್ಯೊ ಮೊಟಾರ್ ಗಾಡಿಯೊ
ಆನಿ ಸೆಜಾರ‍್ಯಾಂಚಿ ಲಡಾಯ್
ಮಾಗಿರ್
ಆಮಿಂಯಿ ಧರ‍್ತಾಂವ್
ವೆವೆಗ್ಳ್ಯೊ ಗಾಡಿಯೊ
ವಿ.ಟಿ. ಸ್ಟೇಶನಾಕ್.
-
ಎಚ್ಚೆಮ್ ಪೆರ್ನಾಳ್(
ವಿ.ಟಿ. ಮ್ಹಣ್ಜೇ ವಿಕ್ಟೋರಿಯಾ ಟರ್ಮಿನಸ್ ಬೊಂಬಯ್ಚ್ಯಾ ಸೆಂಟ್ರಲ್ ರಯ್ಲ್ ವೇಚೆಂ ಶೆವೊಟ್ಚೆಂ ಸ್ಟೇಶನ್ ಆನಿ ಹೆಡ್ ಕ್ವಾಟರ್ಸ್ . ಸೆಂಟ್ರಲ್ ರಯ್ಲ್ ವೇಚ್ಯಾ ವ್ಯಾಪ್ತಿಂತ್ ಜಿಯೆತೆಲ್ಯಾಂಕ್ ಗೇಟ್ ವೇ ಒಫ್ ಇಂಡಿಯಾ , ಜಹಾಂಗೀರ್ ಆರ್ಟ್ ಗ್ಯಾಲರಿ , ಪ್ರಿನ್ಸ್ ಒಫ್ ವೇಲ್ಸ್ ಮ್ಯೂಸಿಯಂ ವಾ ಕಮಲಾ ನೆಹರೂ ಪಾರ್ಕ್ ಜಾಲ್ಲೆಂ ಹ್ಯಾಂಗಿಂಗ್ ಗಾರ್ಡನ್ ಪಳಯ್ಜೆ ತರ್ ಹ್ಯಾ ಸ್ಟೇಶನಾಂತ್ ಧೆಂವಾಜೇ.ಬೊಂಬಯ್ ಆಸುಲ್ಲೆಂ ಮುಂಬಯ್ ಜಾತಾನಾ ವಿ.ಟಿ ಆಸುಲ್ಲೆಂ ಸಿ ಎಸ್ ಟಿ , ಮ್ಹಣ್ಜೇ ಛತ್ರಪತಿ ಶಿವಾಜಿ ಟರ್ಮಿನಸ್ ಜಾಲೆಂ ತರೀ ಆಜ್‍ಇ ಲೊಕಾಜಿಬೆರ್ ವಿ.ಟಿ ಚ್ ಉರ್ಲಾಂ ಫಕತ್ ಇಂಗ್ಲೆಂಡಾಚಾ ರಾಣಿಯೆಚ್ಯಾ ಮೊಗಾನ್‍ ಮಾತ್ರ್ ಮ್ಹಣ್ ಸಾಂಗೊಂಕ್ ಕಶ್ಟ್. - ಎಚ್ಚೆಮ್ )
Copyright © Kavita Trust (R) 2026 . All Rights Reserved.