Poems
ವಾಸ್ಕೋಯನ್
ಪ್ರಕಾಶ್ ಪಾಡ್ಗಾಂವ್ಕಾರ್
ಸಂಪಾದಕೀಯ್:
ಕಾಳೊಕಾಂತ್ಲೆಂ, ವಾಸ್ಕೊಚೆಂ ಚಿತ್ರಣ್ ಸೊಡಯಿಲ್ಲ್ಯೊ ತೀನ್ ಕವಿತಾ
‘ವಾಸ್ಕೋಯನ್’, ಪ್ರಕಾಶ್ ಪಾಡ್ಗಾಂವ್ಕಾರಾಚೆಂ - ಸಾಹಿತ್ಯ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡಲ್ಲೆಂ ಪುಸ್ತಕ್. ತ್ಯಾ ಪುಸ್ತಕಾಂತ್ಲ್ಯೊ ತೀನ್ ಲ್ಹಾನ್-ಸಾನ್ ಕವಿತಾ ಹಾಂಗಾಸರ್ ದಿಲ್ಯಾತ್. ಮುಂಬಯ್ ಶೆರಾಂತ್ಲ್ಯಾ ಕಾಮಾಠಿಪುರಾಬರಿ, ಗೊಂಯಾಂತ್ಲೆಂ ಹೆಂ ವಾಸ್ಕೊ ಶೆರ್ ಖಾಜಿಂಚಿ (ಲೈಂಗಿಕ್ ಇತ್ಸಾ ಆಸ್ಚೆ ವ್ಯಕ್ತಿ) ಖೊರೊಜ್ ರಾವಯ್ತಾ.
ತ್ಯಾ ಎಕೆ ಪಾಟ್‍ಭುಂಯೆರ್ ಹ್ಯೊ ತೀನ್ ಕವಿತಾ ಆಸಾತ್. ತುಮ್ಕಾಂ ರುಚ್ತಲ್ಯೊ ಅಶೆಂ ಅಮಿ ಚಿಂತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವಾಸ್ಕೋಯನ್
1.
ಸಂಸಾರ್ ಭೊಂವುನ್ ಆಯಿಲ್ಲ್ಯಾ
ಎಕಾ ಮನ್ಶಾಕ್ ಹಾಂವೆಂ ವಿಚಾರ್‍ಲೆಂ:
ತುಜೊ ಅಣ್‍ಭವ್ ಕಿತೆಂ?
ತಾಣೆಂ ಸಾಂಗ್ಲೆಂ:
ಮ್ಹಜೊ "ಬುರಾಕ್" ಸೊಡುನ್ ಹಾಂವ್
ಸಂವ್ಸಾರಾಚೆ "ಬುರಾಕ್" ಸೊದೀತ್ ಭೊಂವ್-ಭೊಂವ್ಲೊಂ
ಆನಿ ಶೆವಟಾಕ್ ಕಳ್ಳೆಂ
ಸಗ್ಳೆ "ಬುರಾಕ್" ಸಾರ್ಕೆಚ್ ಆಸ್ತಾತ್.
2.
ಪಬ್ಲಿಕ್ ಸಂಡಾಸಾಂತ್
ಕೊಣೇಂಯ್ ಹಾಗುನ್ ಮುತುನ್ ವೆಚೆಂ
ತಶೆಂ
ಖಾಜಿಚೆ ಲೋಕ್ ಯೇವ್ನ್ ಹಾಂಗಾ
ಖಣ್‍ಖಣೀತ್ ದುಡು ಮೆಜೂನ್
ಎಕಾ "ಬುರಾಕಾಂತ್" ಕಿತ್ಲೆಶೇಚ್
ವೊಂಕುನ್ ವೆತಾತ್
3.
ದುಡ್ವಾಂನಿ ಜಂಯ್ ಆಂಗಾಚಿ ಖಾಜ್ ವಿರ್‍ಗಳ್ಟಾ
ಅಶ್ಯಾ ಹ್ಯಾ ನಖ್ರ್ಯಾಂಚ್ಯಾ ಬಾಜಾರಾಂತ್
ಹಿ ರುಪೇಸ್ತ್ ಚಲಿ ಕೊಣಾಲಿ?
ಜಿಚೆ ಭಾಂಗ್ರಾ ಕೇಸ್ ಜರ್ಮನಿಂತ್ಲೆ ಕುಂವರೆವರಿ,
ಘಾರ್ಶೆ ದೊಳೆ ರುಮಾನಿಯಾಂತ್ಲೆ ಬೇಬಿವರಿ,
ಪೊಲ್ಯಾರ್ ತಾಂಬ್ಸಾಣ್ ಕಾಶ್ಮೀರ್‍ಚೆ ಕಳ್ಯೆವರಿ,
ಕಂವ್ಳೆ ಆಂಗಲಟ್ ಜಪಾನಿ ಬಾವ್ಲೆವರಿ.
ಅಶಿ ದೇಶಾ-ದೇಶಾಂಚಿ ಯಾದ್ ಕರುನ್ ದಿವ್ಪಿ
ಹಿ ಚಲಿ ಕೊಣಾಲಿ?
-ಪ್ರಕಾಶ್ ಪಾಡ್ಗಾಂವ್ಕಾರ್
Copyright © Kavita Trust (R) 2026 . All Rights Reserved.