ಪರತ್ ಏಕ್ ಜಾವ್ಯಾಂ

ಸಂಪಾದಕೀಯ್:

ಜಾತಿ-ಕಾತಿಂ ಮಧೆಂ ಉಬ್ಜೊಂಚೆ ಕರ್ಕರೆ ಆನಿ ಥರ್ಥರ್‍ಯಾಂಕ್ ವೊಕತ್

ಆಮ್ಚ್ಯಾ ಗಾಂವ್ಚ್ಯಾ ಕುಸ್ಡ್ಯಾ ರಾಜಕೀಯಾಚಿ ಗಜಾಲ್, ತ್ಯಾ ವರ್ವಿಂ ಜಾತಿ-ಕಾತಿಂ ಮಧೆಂ ಉಬ್ಜೊಂಚೆ ಕರ್ಕರೆ ಆನಿ ಉಪ್ರಾಂತ್ಲೆ ಥರ್ಥರೆ, ಹೆ ಕವಿತೆಚ್ಯಾ ಪೊಂತಾರ್ ಆಮ್ಕಾಂ ಚಿಂತಿಶೆಂ ಕರೊವ್ನ್, ವಿಲ್ಮಾ ಬಂಟ್ವಾಳಾನ್ ಭೇದ್ ಕರಿನಾಸ್ಚ್ಯಾ ಸಾಂ ಲೊರೆಸಾಕ್ ಆನಿ ಶ್ರೀ ಕೃಷ್ಣಾಕ್ ಮಧೆಂ ಘಾಲುನ್ ತಾಂಚ್ಯಾ ಆದರ್ಶಾಂಚೊ ಪಾಟ್ಲಾವ್ ಕರುಂಕ್ ಉಡಾಸ್ ಕೆಲಾ.

ದಿಸನಾಸ್ಚೆ ಶ್ರೀ ಕೃಷ್ಣ ಆನಿ ಸಾಂ ಲೊರೆಸ್ ಭೇದ್ ಕರಿನಾಂತ್ ಮ್ಹಳ್ಳ್ಯಾವಿಶಿಂ ಮ್ಹಾಕಾ ತರೀ ದುಬಾವ್ ಆಸಾ. ತರೀ ‘ದೇವ್ ಸಗ್ಳೆ ಬರೆಚ್’ ಮ್ಹಳ್ಳಿ ಮನ್ಶಾಕುಳಾಚಿ ಪಾತ್ಯೆಣಿ ಆಸ್ತಾನಾ ಆನಿ ತೆ ಪಾತ್ಯೆಣೆಚೆರ್ ಸಗ್ಳೆಂ ಬರೆಂಚ್ ಜಾತಾ ಮ್ಹಣೊನ್ ಮನೀಸ್ ಚಿಂತಾನಾ, ‘ಪರತ್ ಏಕ್ ಜಾವ್ಯಾಂ’ ಮ್ಹಣೊನ್ ವಿಲ್ಮಾ ಬಂಟ್ವಾಳಾನ್ ಸಾಂಗ್ಚ್ಯಾಂತ್ ಅರ್ಥ್ ಆಸಾ.

ವಿಲ್ಮಾ ಬಂಟ್ವಾಳಾಕ್ ಕೊಂಕಣಿ ಕವಿತಾ ಶೆತಾಂತ್ ಉಜ್ವಲ್ ಫುಡಾರ್ ಆಸಾ. ಕೊಂಕಣಿ ಕವಿತಾ ಶೆತಾಕ್ ಯೆದೊಳಚ್ ಆಪ್ಲ್ಯಾ ಸಮರ್ಪಿತ್ ವಾವ್ರಾ ಮಾರಿಫಾತ್ ತಿ ಲೊಕಾಮೊಗಾಳ್ ಜಾಲ್ಯಾ.

-ಮೆಲ್ವಿನ್ ರೊಡ್ರಿಗಸ್ 

ಕವಿತಾ:

ಪರತ್ ಏಕ್ ಜಾವ್ಯಾಂ

ಧಾಂಪಲ್ಲ್ಯಾ ಆಸ್ಡ್ಯಾಂನಿ
 ಬಾಗ್ವಲ್ಲ್ಯಾ ದಿಂಬ್ಯಾಂನಿ
  ಜೊಡಲ್ಲ್ಯಾ ಹಾತಾಂನಿ
   ಲಿಪಲ್ಲ್ಯೊ ಆಂಗವ್ಣ್ಯೊ
    ಘಾಂಟಿಚ್ಯಾ ನಾದಾಂತ್
     ಆರತಿಚ್ಯಾ ಸ್ವಾದಾಂತ್
      ಮಿಸ್ಳೊವ್ನ್
       ಉಬಾರ್‍ತಾತ್ ಭಕ್ತ್
        ಉಡುಪಿಚ್ಯಾ ಸಿರಿ ಕೃಷ್ಣ ಸಮೊರ್

ಅತ್ತೂರ್‍ಚ್ಯಾ ಪೂನ್‍ಶೆತಾಂತೀ ತಶೆಂಚ್,
 ಖೆಟಿಂತ್ ರಿಗೊನ್
  ಆಂಗವ್ಣ್ಯೊ ಘಾಲುನ್
   ಆಗ್ಮೆಂತಾ ಸವೆಂ
    ಶಿಂವ್ತೆಂ ದೊಳ್ಯಾಂಕ್ ಲಾಯ್ತಾನಾಂಯ್
     ತಿಚ್ ಭಕ್ತ್
      ಸರ್ವ್ ಜಾತಿಕಾತಿಕ್ ಗೊಪಾಂತ್ ಆರಾವ್ನ್
       ಸಾ ಲೊರೆಸ್ ಮ್ಹಣ್ತಾ: ‘ಆಪ್ಣಾಕ್ ಭೇದ್ ನಾ’
        ಸಿರಿ ಕೃಷ್ಣಾಚೇಂಯ್ ಹೆಂಚ್ ತತ್ವ್
         ಪಾಚಾರ್‍ತಾ ಕನಕಾಚೆಂ ಜನೆಲ್

ಉಡುಪಿಚ್ಯಾ ಸಿರಿ ಕೃಷ್ಣಾಕ್ ಆನಿ
 ಅತ್ತೂರ್‍ಚ್ಯಾ ಸಾಂ ಲೊರೆಸಾಕ್
  ನಾತಲ್ಲೊ ಭೇದ್
   ಮ್ಹಾಕಾ ಆನಿ ತುಕಾ ಕಿತ್ಯಾಕ್?
    ಆದಿಂ ನಾತಲ್ಲ್ಯಾ, ಆತಾಂ ಘಡಲ್ಲ್ಯಾ
     ಹಿಂದೂ ಕಿರಿಸ್ತಾಂವ್ ಮನಾಭೇದಾಚಿಂ
      ಪಾಳಾಂ ಆಸ್ಚಿಂ
       ಕುಸ್ಡ್ಯಾ ರಾಜಕೀಯಾಂತ್
        ಸಿರಿ ಕೃಷ್ಣಾಚ್ಯಾ, ಸಾಂ ಲೊರೆಸಾಚ್ಯಾ
         ತೆಚ್ ಭಕ್ತೆಚ್ಯಾ ಸ್ಪಿರಿತಾನ್
          ಏಕ್ ಹಾತ್ ಜಾವ್ಯಾಂ
            ಹಿಂ ಪಾಳಾಂ ಹುಮ್ಟುಯಾಂ
             ಆನಿ ಪರತ್ ಏಕ್ ಜಾವ್ಯಾಂ

ಉಡುಪಿಚ್ಯಾ ಸಿರಿ ಕೃಷ್ಣಾಕ್ ಆನಿ
  ಅತ್ತೂರ್‍ಚ್ಯಾ ಸಾಂ ಲೊರೆಸಾಕ್
    ನಾತಲ್ಲೊ ಭೇದ್
      ಮ್ಹಾಕಾ ಆನಿ ತುಕಾ ಕಿತ್ಯಾಕ್?

-ವಿಲ್ಮಾ ಬಂಟ್ವಾಳ್