Poems
ಫಾಂತ್ಯಾ ವಯ್ಲೆಂ ನೆಕೆತ್ರ್
ರುಫಿನಾ ಡಿ’ಸೋಜಾ
ಸಂಪಾದಕೀಯ್:
ಫಾಂತ್ಯಾಫಾರಾಚ್ಯಾ ನಕೆತ್ರಾಬರಿ ಹಿ ಕವಿತಾ
ಹಿಂ ಭುರ್ಗಿಂ ಫಾಂತ್ಯಾಫಾರಾಚ್ಯಾ ಸುಕ್ರಾಬರಿ. ಕಿತ್ಲಿ ಏಕ್ ಆಪುರ್ಬಾಯ್ ಮ್ಹಣ್ಯಾಂ! ಕವಿತಾ ಟ್ರಸ್ಟಾನ್ ಚಲಯಿಲ್ಲ್ಯಾ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸರ್ತಿಂತ್ 2010 ವರ್ಸಾ ತಿಸ್ರೆಂ ಇನಾಮ್ ಫಾವೊ ಜಾಲ್ಲಿ ಕವಿತಾ ಹಾಂಗಾಸರ್ ಆಮಿ ಪರ್ಗಟ್ ಕೆಲ್ಯಾ.
ರುಫೀನಾ ಡಿಸೋಜಾ ಗೊಂಯ್ಚ್ಯಾ ಸೈಂಟ್ ಕ್ಸೇವಿಯರ್ಸ್ ಹೈಸ್ಕೂಲಾಂತ್ ಧಾವೆ ಕ್ಲಾಶಿಂತ್ ಶಿಕ್ತಾ. ಪೆಡ್ಣೆಚ್ಯಾ ಹ್ಯಾ ಭುರ್ಗ್ಯಾಚಿ ಕವಿತಾ ಆಮ್ಚ್ಯಾ ತೆಗಯ್ ವೊರಯ್ಣಾರಾಂನಿ ಇನಾಮಾ ಖಾತೀರ್ ವಿಂಚ್ಲ್ಯಾ ತರ್, ಹೆ ಕವಿತೆಂತ್ ವಿಶೇಸ್ ಆಸಜೆಚ್. ತಿ ವಿಶೇಸತಾ ಚಾಕೊಂಕ್ ಹಾಂವ್ ತುಮ್ಕಾಂಚ್ ಸೊಡ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಾಂತ್ಯಾ ವಯ್ಲೆಂ ನೆಕೆತ್ರ್
ಲಾಖಾಂನಿ ನೆಕೆತ್ರಾಂ ಮದೆಂ
ಏಕ್ ನಕೆತ್ರ್ ಉದೆವ್ಚೆಂ ಆಸ್ಲೆಂ
ಪುರಾಯ್ ರಾತ್ ಸರತ್ ಆಯಿಲ್ಲಿ
ಪುಣ್ ಆಜೂನ್ ತೆ ಉದೆಂವ್ಕ್ ನಾಸ್ಲೆಂ
ವಾಟ್ ಪಳಯ್ತ್ ಪಳಯ್ತ್ ರಾತ್ ಥಕ್ಲಿ
ಚಾನ್ನೆಂ ನಿರ್‍ಶೆವ್ನ್ ಪರತ್ ಗೆಲೆಂ
ನಖೆತ್ರಾಚೆಂ ಮುಖ್ ಪಳೊಂವ್ಕ್ ಆಶೆಲಿ
ಪುಣ್ ನಖೆತ್ರ್ ಖಂಯಂಚ್ ದಿಸನಾಸ್ಲೆಂ
ರಾತ್ ಸೊಪತ್ ಆಯ್ಲಿ
ಚಾರೂಯ್ ದಿಕೊ ಕಿಣ್ಣ್ ಜಾಲ್ಯೊ
ಶೀತಳ್ಸಾಣೆಚೆ ಸಾವ್ಳೆಂತ್
ಫಾತ್ಯಾರ್ ನಖೆತ್ರ್ ದಿಷ್ಟಿ ಪಡ್ಲೆಂ
ಸೊಬಿತ್ ನಖೆತ್ರ್ ಫಾತ್ಯಾವಯ್ಲೆಂ
ಪಳೊಂವ್ಕ್ ಸಾಮ್ಕೆ ದೆಖ್ಣೆಂ ದಿಸ್ತಾಲೆಂ
ನದರ್ ಲಾಗತ್ ಮ್ಹಣ್ ತಾಕಾ
ರಾತೀನ್ ಕಾಳ್ಖಾಚೆಂ ಕಾಜಳ್ ಲಾಯಿಲ್ಲೆಂ
ಫಾತ್ಯಾವೆಲೆಂ ನಖೆತ್ರ್ ತೆಂ
ಚಡ್ ವೇಳ್ ನಾ ದಿಸ್ಪಾಚೆಂ
ದೀಸ್ ಉದೆತಾಂ ಉದೆತಾಂ
ಖಂಯ್ ತರೀ ಉಜ್ವಾಡಾಂತ್ ನಾ ಜಾಲೆಂ
ಫಾತ್ಯಾವೆಲೆಂ ನಖೆತ್ರ್ ತೆಂ
ಪರತ್ ಕೆನ್ನಾಂ ದಿಸ್ತಲೆಂ?
ದಿಸ್ಲ್ಯಾರ್ ಪರತ್ ಕೆನ್ನಾಂಯ್
ಪಳೊಂವ್ಕ್ ಮನ್ ಮ್ಹಜೆಂ ಆಶೆತೆಲೆಂ.
-ರುಫಿನಾ ಡಿಸೋಜಾ
Copyright © Kavita Trust (R) 2026 . All Rights Reserved.