Poems
ವಾಗಾಚೊ ಸ್ವಗತ್
ಸಂಪಾದಕೀಯ್:
ಆಖ್ಖೆ ಸಮಾಜಾಚೆ ವ್ಯವಸ್ಥೆಕ್ ಥರ್ಥರಾಂವ್ಚಿ ತಾಂಕ್
ಹೊ ಕೊಣ್ ವಾಗ್? ತಾಚಿ ಸಮಸ್ಯಾ ಕಸಲಿ? ಗಾಯ್ರಾಂವಿಶಿಂ ಚಿಂತಲ್ಯಾಂನಿ ಹ್ಯಾ ವಾಗಾಂವಿಶಿಂ ಕಾಂಯ್ ಚಿಂತ್ಲಾಂ? ನ್ಹಯ್ ತರ್ ಗಾಯ್ರಾಲಾಗಿಂ ಆಪ್ಲ್ಯಾ ಪಿಲಾಂಕ್ ಸೊಡ್ನ್ ವೆಚಿ ತಾಚಿ ತಾಂಕ್ ಕಸಲಿ? ಅಸಲ್ಯಾ ಆನಿ ಜಾಯ್ತ್ಯಾ ಹೆರ್ ಸವಾಲಾಂಚೊ ದಾಳೊಚ್ ಎಚ್ಚೆಮ್ ಪೆರ್ನಾಳಾನ್ ಹೆ ಕವಿತೆದ್ವಾರಿಂ ಆಮ್ಚೆ ಮುಕಾರ್ ದಾಳ್ಳಾ.
ಪುನೆಕೋಟಿಚಿ ಕವಿತಾ ಹ್ಯಾ ಆದಿಂಚ್ ಆಮಿ ಕನ್ನಡಾಂತ್ ವಾಚ್ಲ್ಯಾ. ತವಳ್ ಆಮ್ಚ್ಯಾ ಜಿವಾಂತ್ ಎಕಾ ನಮುನ್ಯಾಚೆ ಥರ್ಥರೆ ಪಾಶಾರ್ ಜಾಲ್ಲೆ ಆಸುಂಯೆತಾತ್. ಪುಣ್ ಎಚ್ಚೆಮ್ಮಾನ್ ಅಸಲ್ಯಾ ಥರ್ಥರ್‍ಯಾಂಕಯ್ ಕಸಲಿಚ್ ಘೊರೊಜ್ ಘಾಲಿನಾಸ್ತಾಂ ಸಾದೆಪಣಿಂ ಖಬಡ್ವಾರ್ ಠರಾಯ್ಲಾಂ.
ಥೊಡಿಂಚ್ ಉತ್ರಾಂ. ಪುಣ್ ಸಗ್ಳೆ ಸಮಾಜಾಚೆ ಅವಸ್ಥೆಕಚ್ / ವ್ಯವಸ್ಥೆಕಚ್ ಥರ್ಥರಾಂವ್ಚಿ ತಾಂಕ್. ಶಾಭಾಸ್ ಎಚ್ಚೆಮ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವಾಗಾಚೊ ಸ್ವಗತ್
ಪವಿತ್‌ಗಾಯೆ ಪುನೆಕೋಟಿ
ತುಂ ಸತೆವಂತ್ ಹಾಂವ್ ಕಪಟಿ
ಚರವ್ ತುಕಾ ಪಾಚ್ವೆಂ ತಣ್
ತುಜೆಂ ಮಾಸ್ ಮ್ಹಜೆಂ ಖಾಣ್
ಗೊಟ್ಯಾಂತ್ ರಾಕ್ತಾ ವಾಸ್ರುಂ ತುಕಾ
ಭಂವ್ತಿ ತಾಚ್ಯಾ ಹಾಂಡ್ಕುರಿಂ ಗೊರ್ವಾಂ
ಸಾಂಬಾಳುಂಕ್ ಆಸಾ ಬರೊ ಗೊವ್ಳಿ
ಮಾಟ್ಯಾಂತ್ ಉಪಾಶಿಂ ಮ್ಹಜಿಂ ಪಿಲಾಂ
ಪವಿತ್‌ಗಾಯೆ ಪುನೆಕೋಟಿ
ಸಂಸಾರ್ ತುಜಿ ಭಿರ್ಮತ್ ಪಾವ್ತಾ
ಸರ್ಗಿಂಥಾವ್ನ್ ಕುರ್ಪೆ ಶಿಂವೊರ್ ದೆಂವ್ತಾ
ಸರ್ಕಾರ್ ತುಜ್ಯಾ ಕುಮ್ಕೆಕ್ ರಾವ್ತಾ
ದೆಕುನ್,
ಖಾವ್ನ್ ತುಕಾ ಕರಿನಾ ಅಪ್ರಾಧ್
ದೆವಾ ಮುಕಾರ್ ಜಾಯ್ನಾಂ ಗುನ್ಯಾಂವ್ಕಾರ್
ಸಾಂಡುನ್ ವೆತಾಂ ಪಿಲಾಂಕ್ ಮ್ಹಜ್ಯಾ
ಪೊಸ್‌ಗೆ ತಾಂಕಾಂ ದುದಾನ್ ತುಜ್ಯಾ
- ಎಚ್ಚೆಮ್
Copyright © Kavita Trust (R) 2026 . All Rights Reserved.