Poems
ನೆಟ್‍ವರ್ಕ್ ಬಿಝಿ
ಸಂಪಾದಕೀಯ್ :
ಸ್ವತಾಚೊ ಸೊಧ್ ಕರಪಿ ರಾಜಯ್ ಪವಾರಾಚಿ ಆಧುನಿಕ್ ಕವಿತಾ
ಸಂಸಾರಾಕಡೆನ್ ಝಾಂಕ್ ಮಾರುಂಕ್ ವಚೊನ್ ಹ್ಯಾ ಮನ್ಶಾಕ್ ಆಪ್ಲ್ಯಾಚ್ ಅಸ್ಥಿತ್ವಾಚಿ ವಿಸರ್ ಪಡ್ಲ್ಯಾ. ಹ್ಯಾ ಸಂಸಾರಾಚೆ ಗಿರೇಸ್ತ್ ಕಾಯೆ ಪಾಟ್ಲ್ಯಾನ್ ಗೆಲ್ಲೆ , ಗಿರೇಸ್ತಕಾಯ್ ಆಪ್ಣಾಯ್ತಾನಾ ಆಪ್ಣಾಕ್ ಹೊಗ್ಡಾಂವ್ಕ್ ಪಾವ್ತಾತ್. ತಶೆಂ ಜಾಲಾಂ ಹೆ ಕವಿತೆಂತ್. ನಿಮಾಣೆಂ ತೊ ನಿಚೆವ್ ಕರ‍್ತಾ ಕಶೆಂ ತರೀ ಅಪ್ಣಾಲಾಗಿಂ ಉಲೊಂವ್ಚೊ. ತರೀ ತಾಚಿ ತಾಕಾ ಲಾಯ್ನ್ ಲಾಗನಾ. ನಿಮಾಣೆಂ ತಾಚೆಲಾಗಿಂ ಉಲೊಂವ್ಕ್ ಸಂದರ್ಭ್ ಮೆಳ್ಳೊ ತರ್ ಬ್ಯಾಲೆನ್ಸ್ ಉರ್ಲೆಂ ನಾ ತರ್ ಗತ್ ಕಿತೆಂ? ಹಿ ಕವಿತಾ ವಾಚ್ತಾಂ ವಾಚ್ತಾನಾ ಬೆಂಗಾಲಿ ಕವಿ ಬುದ್ಧ ದೇವ್ ದಾಸಗುಪ್ತಾಚಿ ಹ್ಯಾಂಗರ್ ಕವಿತಾ ಜಿ ಕಾನಡಿಂತ್ ಅನುವಾದಿತ್ ಜಾಲ್ಯಾ ತಿ ವಾಚ್ಚೆಂ ಭಾಗ್ ಮೆಳ್ಳೆಂ. ಹಾಂಗಾಸರ್ ಏಕ್ ಹ್ಯಾಂಗರ್ ಅಸಲೆಚ್ ವ್ಯಕ್ತಿಕ್ ಆಲ್ಮಾರಿಂತ್ ವೋಡ್ನ್ ವ್ಹರ‍್ತಾ ಆನಿ ಮರಾ ಪರ್ಯಾಂತ್ ಕಶೆಂ ಉಮ್ಕಳ್ಚೆಂ ಮ್ಹಳ್ಳೆವಿಶಿಂ ಶಿಕಯ್ತಾ. ರಾಜಯಾಚೆ ಹೆ ಕವಿತೆನ್ ಕಾವ್ಯಶೆತಾಚ್ಯಾ ನವ್ಯಾ ಎಕಾ ದಿಗಂತಾಚೆರ್ ಆಪೊವ್ನ್ ವೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನೆಟ್‍ವರ್ಕ್ ಬಿಝಿ
ಭಾವ್-ಭಯ್ಣ್
ಬಾಯ್ಲ್-ಭುರ್ಗಿಂ
ಶೆಜಾರಿ-ಪಾಜಾರಿ
ಈಷ್ಟ್-ಸೊಯ್ರೆ
ಲಾಗಿಂಚೆ-ಪಯ್ಸುಲ್ಲೆ
..ಸಗ್ಳ್ಯಾ ಸಂವ್ಸಾರಾ ಕಡೆನ್
ದೀಸ್-ರಾತ್ ಝಾಂಕ್ತಾಂ ಹಾಂವ್ ಫೊನಾಚೆರ್
ವೊರಾಂಚಿಂ ವೊರಾಂ... ವರ್ಸಾಂಚಿಂ ವರ್ಸಾಂ
ಆನಿ ಅಚ್ಕಿತ್ ಮ್ಹಾಕಾ
ಮ್ಹಜೀಚ್ ಯಾದ್ ಜಾತಾ
.. ಆರೆ! ಕಿತ್ಲಿಂಶೀಂಚ್ ವರ್ಸಾಂ ಜಾಲಿಂ
ಹಾಂವ್ ಮ್ಹಜೆ ಕಡೆನ್ ಉಲೊಂವ್ಕಚ್ ನಾ!
.. ಮಾಗೀರ್ ಹಾಂವ್ ಮ್ಹಜ್ಯಾಚ್ ಮೊಬಾಯ್ಲಾ ವೆಲ್ಯಾನ್
ಮ್ಹಾಕಾಚ್ ಫೊನ್ ಲಾಯ್ತಾಂ
... ಪುಣ್ ಲಾಗನಾ ಕಸೋಚ್
ಒಲ್ ದ ಟಾಯ್ಮ್... ಎಂಗೇಜ್ಡ್!
.. ಕುಂ ಕುಂ ಕುಂ.. ನೆಟ್‍ವರ್ಕ್ ಬಿಝಿ!
ದೀಸ್-ರಾತ್ ಟ್ರಾಯ್ ಕರ‍್ತಾಂ
ಮ್ಹಾಕಾ ಫೊನ್ ಲಾವ್ಚೆ ಖಾತೀರ್
.. ಪುಣ್ ಮ್ಹಜೊ ಫೊನ್ ಲಾಗ್ಚೆ ಆದೀಂಚ್
ಕೊಣಾಲೊ ನಾ ಕೊಣಾಲೊ ತರೀ ಕೊಲ್ ಯೆತಾಚ್
ಆನಿ ಹಾಂವ್ ಕನೆಕ್ಟೂಚ್ ಜಾಂವ್ಕ್ ಪಾವನಾ ಮ್ಹಜೆ ಕಡೆನ್
ಹರ್ಶಿಂ.. ಲೋಕಲ್.. ನೇಶನಲ್.. ಇಂಟರ‍್ನೇಶನಲ್
ಸಗ್ಳೆ ನಂಬರ್ ಖಿಣಾಂತ್ ಕನೆಕ್ಟ್ ಜಾತಾತ್
... ಆನಿ ಮ್ಹಜೋಚ್ ನಂಬರ್
ಕಿತ್ಯಾಕ್ ಬಿಝಿ ಕಾಯ್??
ಪುಣ್ ಜೆನ್ನಾ ಕನೆಕ್ಟ್ ಜಾತಲೊಂ
ಹಾಂವ್ ಮ್ಹಜೆ ಲಾಗಿಂ
ತೆನ್ನಾ ಮನ್ ಭರುನ್ ಉಲೊವ್ನ್ ಘೆತಲೊಂ
... ಮ್ಹಜ್ಯೊ ಭಾವನಾ, ಮ್ಹಜಿಂ ಸಪ್ನಾಂ
ಶೇರ್ ಕರ‍್ತಲೊಂ ಮ್ಹಜ್ಯಾ ಕಾಳ್ಜಾ ಕಡೆನ್
.. ಮಾತ್ ತೆನ್ನಾ ಬ್ಯಾಲೆನ್ಸ್ ಉರ‍್ಲ್ಯಾರ್ ಪುರೊ
ಮನ್‍ಭರ್ ಉಲೊಂವ್ಕ್.. ಡಿಸ್‍ಕನೆಕ್ಟ್ ಜಾಯ್ ಮೆರೆನ್!
- ರಾಜಯ್ ಪವಾರ್
Copyright © Kavita Trust (R) 2026 . All Rights Reserved.